A Asociación de Comerciantes de Narón comezou a súa andaina coa súa presentación nunha rolda de prensa que tivo lugar na mañá de onte no Concello. Cinco dos sete compoñentes da xunta directiva, entre eles o seu presidente, Ricardo Pereira, e a vicepresidenta, Lucía Sanesteban, estiveron presentes e acompañados pola primeira Tenente de Alcaldía, comprometida dende o principio co nacemento desta asociación.
A Asociación de Comerciantes de Narón nace cunha meta principal: dar a coñece–lo comercio de Narón, non só ós naroneses, senón tamén ós posibles clientes de fóra do municipio. Para iso, o Concello está xa a traballar nunha guía sobre o comercio de Narón e na elaboración dun censo do mesmo. A asociación tamén ofrece vantaxes ós asociados, como condicións bancarias moi asequibles e participación en campañas que serían moi custosas a nivel particular, como as de Nadal ou a das rebaixas.
Para Ángeles Díaz a asociación de comerciantes era unha carencia do municipio, que freaba os intereses do comercio naronés en xeral, ata o de agora “un gran descoñecido”. A concelleira considera que son os propios comerciantes os que coñecen mellor as necesidades do seu sector e as actuacións precisas para solventalas. Asemade, afirmou que a economía de Narón baséase en dous piares: a industria e o pequeno comercio, este último, fundamental para a economía diaria.
Ángeles Díaz recordou tamén que xa dende moito atrás, o Concello tratou de transmitir esta necesidade asociativa que tiña que ser levada a cabo polos propios comerciantes, e apoiou a iniciativa en todo momento, tildando de “valentes” ós sete directivos da nova asociación, e abríndolle-las portas do Concello para prestarlles toda a axuda posible.
O presidente da asociación, Ricardo Pereira, agradeceu esa man tendida do Concello e, en especial, o apoio que levan recibido en todo este tempo de Ángeles Díaz, a quen, segundo as súas verbas, a asociación débelle o seu nacemento. Ricardo Pereira manifestou a súa firme convicción de que o comercio naronés ten un enorme potencial e unha grande calidade e personalidade.
Ata o de agora a asociación conta con 70 integrantes, unha cifra exitosa tendo en conta que aínda non realizou actividades, e está nos seus primeiros pasos. E agardan alcanzar o centenar de asociados a finais de ano. A cuota é de 60 euros anuais. Os comerciantes están chamados á primeira convocatoria da Asociación o vindeiro día 12 de novembro, no Auditorio Municipal de Narón.
Narón, 7 de novembro de 2008.
