O Plan de Emprego Experimental do Concello logra insertar á maioría dos alumnos inscritos nos seus cursos

O alcalde de Narón, Jose Manuel Blanco, e a concelleira de Formación Laboral e Emprego, Paloma González Cuevas, entregaron onte os diplomas ós alumnos do Plan de Emprego Experimental “Construnar 09″, promovido polo Concello. Este programa foi deseñado especificamente atendendo ás demandas dos empresarios da comarca, e dos propios usuarios do plan. Deste xeito, o Concello promoveu un total de tres cursos (manipulador de alimentos, carretilleiro, e prevención de riscos laborais) que foron seguidos con éxito por 33 persoas.

Todas elas están xa traballando, segundo recordou hoxe a responsable de Formación Laboral, Paloma González Cuevas. A edil explicou que o compromiso do Concello coa Xunta (quen financia parte do programa) era acadar unha inserción laboral do 20% dos alumnos, algo que se superou con creces. Nestes intres, a porcentaxe de inserción é do 66%, xa que inicialmente se seleccionaron 50 persoas -preferentemente mulleres e persoas pertencentes a sectores que están sufrindo a crise, como a construción-.

O programa contou cun orzamento total de 47.500 euros (36.000 euros achegados pola Consellería de Traballo, e os 11.500 euros restantes foron achegados polo Concello de Narón).

Os cursos comezaron o 1 de decembro de 2008, e rematarán o 31 de xullo deste ano.

Narón, 17 de abril de 2009

As concelleiras de Promoción Económica e de Formación visitan ós alumnos dos cursos FIP impartidos en Pena Parda

As Concelleiras de Promoción Económica, Mª Ángeles Díaz Pardo, e de Formación e Emprego, Paloma González Cuevas, visitaron esta mañá ós alumnos dos cursos FIP impartidos en Pena Parda, no centro de formación da Asociación Provincial de Talleres. Na visita estiveron acompañadas polo Xerente da Asociación de Talleres da Coruña, José Manuel Cascales, o Presidente da Delegación de Ferrolterra, José Manuel Vilaboy, o Vicepresidente da mesma, José Manuel Picos e dous dos seus membros, Francisco Ezquerro e José Luis Suárez.

Neste momento son dous os cursos FIP que se levan a cabo no centro de formación, con quince alumnos cada un: Chapa e Pintura e Electricidade e Mecánica. Os dous teñen unha duración de 700 horas e veñen avalados por un título homologado da Xunta de Galicia. O Xerente da Asociación de Talleres da Coruña, José Manuel Cascales, destacou a alta porcentaxe de alumnos participantes que se incorporaron á vida laboral, un 85% do total de 527 xa titulados. Na actualidade, un 50% dos alumnos son xoves de Narón, mentres que o 50% restante se compón de xoves de Ferrol e outros concellos da bisbarra. O Centro leva xa impartidas 12.105 horas de formación dende que comezou a sua andaina, e non só a aprendices, senón tamén ós propios profesionais da automoción, que acoden a reciclar os seus coñecementos nun sector no que os adiantos tecnolóxicos sucédense moi de presa.

As Concelleiras de Promoción Económica e Emprego mostráronse moi interesadas nuns cursos con tal alto nivel de colocación laboral, e fixéronse eco das peticións que lles trasladaron os responsables da Asociación Provincial de Talleres e, en particular, o Vicepresidente da Delegación de Ferrolterra, José Manuel Vilaboy. Unhas peticións baseadas na necesidade de ampliar espazo para unha nova cabina de pintura e unha maior comodidade nas aulas e vestiarios, e no asfaltado da entrada á nave, que agora mesmo desprende moita sucidade ó seu interior.

Paloma González comprometeuse a estuda-las posibles solucións ó problema do espazo das instalacións e a urxir dende o Concello o asfaltado da entrada ás mesmas. Así mesmo, salientou a “necesidade que ten o mercado laboral de profesionais cualificados e cunha formación específica”. Ángeles Díaz Pardo, pola súa parte, destacou “a presenza, cada vez máis importante, de mulleres en cursos tradicionalmente masculinos”, catro nestes cursos, e o “alto nivel de responsabilidade e compromiso dos alumnos”, que reciben a visita dunha delegada da Xunta para controla-la sua asistencia e que con tres faltas sen xustificar estarían expulsados do curso.

Narón, 29 de setembro de 2008.

Continuación dos cursos de alfabetización dixital no rural

Despois do importante éxito desta nova actividade promovida pola Concellalía de Novas Tecnoloxías, trala realización dos cursos de iniciación durante o mes de xullo, durante o mes de setembro desenvolverase o segundo nivel dos mesmos.

Así, dende este mes de setembro, e nos locais sociais das asociacións que o solicitaron, desenvolveranse os cursos de perfeccionamento, para consolida-los coñecementos adquiridos e aprender novas cuestións sobre Internet e as novas tecnoloxías.

Narón, 1 de setembro de 2008.

Responsables do Concello e de Caixa Galicia entregaron os diplomas ós 26 alumnos que remataron con éxito tres cursos de formación e emprego

A Concelleira de Formación Laboral e Emprego de Narón, Paloma González Cuevas, presidiu hoxe a entrega de diplomas ós 26 alumnos que finalizaron con éxito tres cursos do programa de formación e emprego, organizados polo Concello de Narón en colaboración coa Obra Social de Caixa Galicia. Estes seminarios tiveron un custo global de 46.300 euros e, en conxunto, sumaron 1.370 horas de formación teórica e práctica.

Os cursos en cuestión son os seguintes:

• Iniciación ás construccións metálicas (con 500 horas de duración e 11 alumnos matriculados dos cales 9 finalizaron con éxito e recolleron hoxe o seu diploma)
• Restauración da madeira e moble (500 horas, 11 inscritos dos que 7 finalizaron con diploma) e
• Dependenta de comercio (370 horas, 15 mulleres inscritas das cales 10 obtiveron diploma).

Estas accións formativas están coordinadas polo Servizo Sociocomunitario Municipal e desenvolvéronse no Centro Municipal de Formación, ubicado no Polígono de A Gándara. Os cursos de Iniciación ás construccións metálicas, e Restauración da madeira e moble concíbense coma unha primeira toma de contacto coa especialidade e un achegamento básico ao mundo profesional mediante o manexo de ferramentas e máquinas, ademáis da elaboración de construcions elementais. Algúns destes alumnos continúan na actualidade a sua formación laboral, a través dos cursos de Caldereiro e Tubeiro, e Carpintería, correspondentes ó Plan FIP.

No caso do curso de Dependenta de comercio, na actualidade rexístrase xa un saldo positivo de 3 contratos, que nos vindeiros seis meses se verán incrementados polo traballo de colaboración mantida coas entidades comerciais.

No acto de entrega de diplomas, a Concelleira de Formación Laboral e Emprego dirixíuse ós alumnos que finalizaron con éxito os cursos sinalando que iniciativas coma ésta “constitúen unha boa inversión, a mellor que se pode realizar dende unha administración pública”. A Edil lembrou tamén que a finalidade dos seminarios é “ofrecer unha formación específica para que os participantes poidan introducirse no mercado laboral”.

En representación da Obra Social de Caixa Galicia, a xerente en Ferrol, Elena Cardona, engadíu que esta entidade e o Concello de Narón levan varios anos colaborando a través de cursos de formación que teñen como obxectivo final facilitar o acceso ó mercado laboral.

Narón, 14 de xullo de 2008

A Concelleira de Formación Laboral visita ós alumnos dos cursos que se celebran ó amparo do Plan FIP

A Concelleira de Formación Laboral e Emprego de Narón, Paloma González Cuevas, visitou hoxe ós alumnos que participan no Plan de Inserción Profesional 2008 (Plan FIP), que leva a cabo o Concello de Narón en colaboración coa Consellería de Traballo da Xunta, e o Fondo Social Europeo. En total, o orzamento previsto para os seis cursos é de 463.591,75 euros. Aquí se inclúen os gastos de persoal docente, administrativos, consumibles, aluguer de maquinaria, seguros, e incluso as becas e bolsas mensuais que se abonan ós participantes.

Os seminarios estanse a desenvolver na Nave de Formación “Irmans Froilaz”, situada no Polígono de A Gándara e de propiedade municipal. A programación desta nova edición do Plan FIP contempla os seguintes cursos: Albanelería, Electricista de Edificios, Electronicista básico de Edificios, Caldereiro-tubeiro, Carpinteiro, e Auxiliar de Axuda no Fogar. Todos eles están xa en marcha, salvo o último que dará comenzo a próxima semana.

A Edil responsable de Formación Laboral explicou que esta nova edición do Plan FIP dará formación a 90 desempregados que recibirán, ademáis de nocións específicas, unha formación complementaria de módulos transversais en materia de Formación para a Igualdade (10 horas) e de Alfabetización Informática e Internet (25 horas). Ademáis, os alumnos que rematen os cursos participarán nun programa de colocación nas empresas, a través do equipo de orientación laboral e emprego do Servizo Sociocomunitario Municipal.

Os beneficiarios do Plan FIP 2008 reciben clases teóricas e prácticas na nave de formación de A Gándara, onde dispoñen do lugar axeitado para realiza-las probas necesarias correspondentes ás materias ensinadas. É o caso, por exemplo, dos alumnos do Cursos de Albanelería e Carpinteiría, xa que a sua programación inclúe a construcción interior dunha casa (paredes, cheminea, armarios empotrados, cociñas, portas e fiestras).

Narón, 3 de xullo de 2008

A Concellería de Novas Tecnoloxías inicia hoxe en Sedes o programa de cursos de Internet na zona rural

A Concelleira de Novas Tecnoloxías de Narón, Paloma González Cuevas, ven de anuncia-lo inicio no día de hoxe do Programa de Cursos de Internet no Rural, co que o goberno municipal pretende estende-lo uso das novas tecnoloxías ás parroquias máis diseminadas do centro urbán de Narón.

En total inscribíronse 92 alumnos ó curso de Iniciación á Informática, dirixido a persoas que non tiveron contacto previo cos ordenadores. As clases impartiranse nos locais sociais municipais das seguintes parroquias: Pedroso, O Val, Castro, San Xiao e Sedes.

En cada unha destas asociacións instalaranse ordenadores portátiles –un por cada alumno- co fin de que os inscritos poidan familiarizarse en primeira persoa coas novas tecnoloxías, e adquiri-los primeiros coñecementos para poder navegar por Internet.

Os cursos teñen unha duración de 10 horas (repartidas en 7 clases de 90 minutos cada unha), e se levarán a cabo nos seguintes horarios:

• Sedes: días 27 e 30 de xuño e 2, 4, 7, 11 e 18 de xullo.

Horario: de 20 a 21:30 horas. 10 persoas inscritas.

• O Val: días 1, 3, 8, 10, 15, 17 e 18 de xullo.

Establecéronse dous turnos: de mañá (10:30 a 12 horas) e de tarde (18 a 19:30 horas).

• Castro: días 2, 4, 7, 9, 11, 14 e 16 de xullo.

Dous turnos: de 16 a 17:30 horas e de 18 a 19:30 horas.

• San Xiao: días 21, 22, 23, 24, 28, 29 e 30 de xullo.

Dous turnos: de 16 a 17:30 horas e de 18 a 19:30 horas.

• Pedroso:
  Primeiro grupo: días 26 de xuño, e 1, 3, 8, 9, 10 e 14 de xullo.
  Segundo grupo: días 15, 16, 17, 21, 23, 28 e 30 de xullo.
  Ambos en horario de 20 a 21:30 horas.
  

A Concelleira de Formación, Emprego e Novas Tecnoloxías, Paloma González Cuevas, visitará cada un destes cursos co fin de saudar ós asistentes e comproba-la utilidade dos mesmos, que en setembro se complementarán con outro de Perfeccionamento no uso de ordenadores (ata agora, hai 32 solicitudes para este último).

Narón, 26 de xuño de 2008

A Concelleira de Emprego destaca a boa sintonía mantida coa delegada da Consellería de Traballo durante unha xuntanza mantida hoxe en A Coruña

A Concelleira de Formación Laboral e Emprego, Paloma González Cuevas, mantivo hoxe unha xuntanza coa delegada provincial da Consellería de Traballo da Xunta, María Debén. Á reunión, celebrada en A Coruña, asistiu tamén o Alcalde de Narón, Xoán Gato, quen apoiou á edil de emprego nas súas iniciativas.

González Cuevas destacou a boa sintonía mantida entre ambas administracións, e explicou que a entrevista tivo como obxecto “manter unha primeira toma de contacto para establecer unha serie de cuestións nas que se pode colaborar, para mellora-la formación e reduci-lo índice de paro en Narón”.

Os representantes do Concello e da Xunta coincidiron en que un dos puntos estratéxicos no cal se debe incidir é no sector das mulleres, orientándoas na búsqueda de emprego e apoiándoas na formación laboral.

Outro dos temas tratados nesta reunión foi a capacidade industrial deste concello e a necesidade de potenciar esta cualidade. “Queremos coñece-los problemas e as demandas das empresas, para buscar solucións en materia laboral. Para iso temos a unha axente de emprego contratada a través dunha subvención da Xunta, que traballa nesta idea visitando os polígonos industriais nos que se ubican a maioría das empresas de Narón”, dixo.

A Concelleira de Formación Laboral e Emprego engadiu que o Concello estudiará a posibilidade de realizar formación especializada de parados, a través de programas subvencionados pola Xunta de Galicia. A responsable de Formación Laboral e Emprego e o Alcalde de Narón entregaron á Delegada Provincial de Traballo un dossier no que se recollen as accións levadas a cabo durante o pasado ano no Concello sobre esta materia, e tamén a programación en marcha e pendente de adxudicación.

Neste último apartado, o Concello está á espera de que a Xunta conceda a financiación necesaria para a contratación de desempregados nas seguintes áreas: servizos turísticos, servizos culturais e animación sociocultural, conservación de espazos naturais e lugares de interese comunitario, reparación de beirarrúas e de pistas polideportivas e edificios municipais, e obras de mellora en alumeado en viais, prazas e espazos públicos, entre outros.

Neste ano 2008 impartiranse en Narón seis cursos do Plan FIP -financiado pola Consellería de Traballo, algún deles xa en marcha- correspondentes ás seguintes especialidades: Albanel, Electricista, Electronicista, Caldeireiro Tubeiro, Carpinteiro, e Auxiliar de Axuda no Fogar.

Finalmente, os políticos locais convidaron á delegada de Traballo a visitar Narón para coñecer de primeira man a realidade laboral e a capacidade industrial deste municipio.

Narón, 15 de maio de 2008

O Concello achegará o uso das novas tecnoloxías ós veciños da zona rural

A Concelleira de Novas Tecnoloxías de Narón, Paloma González Cuevas, ven de anuncia-la posta en marcha, de xeito inminente, de cursos de formación en novas tecnoloxías, dirixidos ós veciños da zona rural. Trátase dunha iniciativa municipal, coa que o Concello de Narón pretende leva-lo programa de alfabetización dixital ALFATEC ós veciños do extrarradio. “Sabemos que a poboación da zona rural ten máis problemas de desprazamento que a urbana, e por iso pretendemos achega-los cursos a estes veciños a través dos locais sociais municipais”, sinalou ó respecto a Concelleira de Novas Tecnoloxías.

Paloma González Cuevas explicou que os cursos se dividirán en dúas fases, na primeira das cales se ensinarán –a través de equipos informáticos portátiles- os coñecementos básicos de informática. Unha vez superado este curso, os veciños terán a oportunidade de introducirse no mundo de Internet, para o cal dende o Concello se lles aportará a formación necesaria para saber navegar pola rede.

Co fin de darlle a maior difusión posible a estas dúas actividades, o Concello repartirá, nos locais sociais e tamén en establecementos públicos, unha serie de trípticos nos que se recolle toda a información ó respecto (número de prazas de cada curso, datas de celebración, contido do mesmo…).

As aulas informáticas habilitaranse nos diferentes locais das asociacións de veciños do rural, de xeito que o programa de alfabetización dixital poida chegar ó maior número de habitantes posible. Unha vez finalizados estes cursos de formación, dende o Concello se lles ofrecerá un terceiro seminario, incluido no Plan de Modernización Dixital do Concello de Narón. Este último servirá para que os participantes aprendan a realizar trámites administrativos co Concello a través de Internet.

Narón, 22 de abril de 2008