A segunda xornada do Foro ‘Familia e crise económica’ abordará hoxe o aforro e o consumo sostible

A Concellería de Formación Laboral do Concello de Narón desenvolverá hoxe a segunda xornada do Foro “Familia e crise económica”, que se está a celebrar na Sala de Conferencias da Biblioteca Municipal do Alto, a partires das 20 horas.

A xornada de hoxe estará adicada ó aforro e ó consumo sostible, e contará coa participación de Juan Manuel Thomas Calvo (enxeñeiro superior industrial) e Carlos Gómez Martínez (abogado e ex Subdirector Xeral de Enerxía e Minas da Xunta de Galicia). O primeiro falará sobre consumo doméstico, aforro enerxético, etiquetado, o Plan Renove e outras axudas, mentres que o segundo relator explicará a facturación e as tarifas da luz e do gas. Este acto estará presentado pola primeira Tenente de Alcade, Angeles Díaz Pardo.

Na mesa sobre aforro e consumo sostible explicarase como se conforma o recibo da luz e como é agora a nova tarifa nocturna. Ademáis, ofreceranse técnicas sinxelas para abarata-lo recibo do gas e o da electricidade nos fogares. Tamén se darán a coñece–las axudas que existen para aforrar enerxía, e onde poden solicitarse.

O foro sobre “Familia e crise económica” rematará mañá venres, coa mesa redonda sobre publicidade e prezos.

Narón, 12 de febreiro de 2009

A Biblioteca Municipal acolle dende o mércores e ata o venres o foro “Familia e crise económica”

A Biblioteca Municipal do Alto acolle entre o mércores e o venres o segundo foro organizado pola Concellería de Promoción Económica do Concello de Narón, dirixida pola edil Paloma González Cuevas.

Baixo o título de “A familia e a crise económica”, o foro está dividido en tres charlas que se celebrarán de 20 a 22 horas. A xornada do mércores está adicada ós aspectos básicos de economía nos fogares. Interverán dous relatores:

Antonio Aguarón Turrientes (experto en consumo, e ex xefe do Servizo Provincial de Consumo da Xunta de Galicia), falará sobre o presuposto básico no fogar, contas bancarias, fondos de inversión e pensións, as novas ofertas hipotecarias e créditos rápidos.

Joaquín Álvarez Domato (economista e experto en consumo) falará sobre o sobreendebedamento, o diñeiro de plástico, a reunificación de débedas e a súa problemática, as familias nos procesos concursáis, e o fondo de garantía de depósitos.

A data de hoxe, existen preto de 180.000 familias en España con problemas para paga-la súa hipoteca, debido a que as cotas aumentaron ata nun 80% nos últimos tres anos. Ademáis, son moitos os consumidores que recorren a créditos personais, aínda sen saber cal é a súa capacidade de endebedamento.

Os temas que se abordarán no foro do mércores están relacionados con estas cuestións, co día a día das familias, a hipoteca, o crédito, as tarxetas bancarias e o excesivo aumento de gastos en servizos básicos coma a luz ou o gas. A charla estará adicada ó presuposto familiar e o endebedamento, e permitirá coñecer as novas ofertas hipotecarias e os problemas dos créditos rápidos. Tamén se abordarán as consecuencias de emprega-lo diñeiro de plástico e como se poden reconduci-las débedas.

Narón, 12 de febreiro de 2009

O Concello convoca as familias a asistir a un foro no que se aportarán claves para supera-la crise económica

O Concello de Narón, a través da Concellería de Formación Laboral, ven de organizar un ciclo de charlas titulado “A crise económica e as familias”, que se desenvolverá os días 11, 12 e 13 de febreiro na sala de conferencias da Biblioteca Municipal do Alto. O Alcalde de Narón, Xose Manuel Blanco, e a Tenente de Alcalde, Angeles Díaz, presentaron en rolda de prensa estas conferencias, definíndoas coma “unhas xornadas de moito interese, nas que se ofrecerán claves prácticas para que as familias poidan chegar a fin de mes”, dixo o rexedor.

As conferencias terán lugar ás 20 horas, e nelas participarán expertos en consumo, electricidade e banca. A continuación, detállase o programa:

-Día 11 de febreiro: “Aspectos básicos de economía nos fogares”.

Intervirán Antonio Aguaron Turrientes (experto en consumo, e ex xefe do Servicio Provincial de Consumo da Xunta de Galicia) e Joaquín Alvarez Domato (economista e experto en consumo). Abordaranse os seguintes temas: presuposto básico no fogar, contas bancarias, fondos de inversión e pensión, novas ofertas hipotecarias e créditos rápidos, sobreendebedamento e reunificación de débedas, e fondo de garantía de depósito.

-Día 12 de febreiro: “Aforro e consumo sostible”

Intervirán Juan Manuel Thomas Calvo (enxeñeiro industrial) e Carlos Gómez Martínez (abogado e ex Subdirector Xeral de Enerxía e Minas da Xunta de Galicia). Temas: consumo doméstico, aforro enerxético, etiquetado e plan renove, facturación e tarifas da electricidade e do gas.

-Día 13 de febreiro: “Publicidade e precios”

Intervirán Fernando Ramos Fernández (profesor titular de Dereito da Información e da Publicidade da Universidade de Vigo) e José María Pita Ponte (Subdirector Xeral de Xestión de Programas do Retorno e a Inmigración da Xunta de Galicia). Os temas dos que se falará nesta xornada son a publicidade e a comunicación, as ofertas publicitarias, os concursos e premios e as marcas brancas.

Narón, 12 de febreiro de 2009