A Concellería de Novas Tecnoloxías recibe preto de 40 solicitudes para a cesión de ordenadores en propiedade

A Concellería de Novas Tecnoloxías, dirixida por Paloma González Cuevas, está a valorar nestes días as solicitudes presentadas polas asociacións e entidades inscritas no Rexistro Municipal de Asociacións, de cara á cesión de material informático en propiedade.

Durante o prazo no que se mantivo aberta a convocatoria, o Concello de Narón recibiu preto de 40 solicitudes que nestes días se baremarán tendo en conta unha serie de criterios como o número de socios das entidades, o programa de actividades que desenvolven e se requiren o uso de ordenadores, e o local no que realizan o seu traballo. (As bases desta convocatoria permanecen expostas na páxina web municipal, www.naron.es, por si desexades consultalas).

A comisión de valoración estará integrada por tres técnicos dos departamentos de Patrimonio, Intervención e Servizo Sociocomunitario. Eles serán os encargados de baremar dende hoxe as solicitudes, e se reunirán o vindeiro día 3 de abril para dar a coñece-los nomes das entidades ás que se entregarán os equipos informáticos.

Narón, 31 de marzo de 2009

A Concellería de Novas Tecnoloxías cederá material informático ás asociacións e entidades inscritas no Rexistro Municipal de Asociacións

A Concellería de Novas Tecnoloxías de Narón, dirixida por Paloma González Cuevas, ven de anuncia-la cesión en propiedade de material informático municipal ás asociacións e entidades inscritas no Rexistro Municipal de Asociacións.

Trátase dunha nova iniciativa que permitirá desafectar 30 ordenadores que no seu día pertenceron ás instalacións da Biblioteca Municipal do Alto, que dende o pasado mes de xaneiro dispón de novos equipos informáticos. Este material se cederá en propiedade ás asociacións e entidades con sede ou delegación permanente en Narón, mediante unha convocatoria pública.

Os interesados poden descarga-las bases da convocatoria e o impreso de solicitude da páxina web municipal (www.naron.es) ou ben solicitalo no Rexistro Xeral do Concello. O prazo para participar nesta convocatoria é de 15 días hábiles e comezou o día 23 deste mes.

Xunto coa instancia debidamente cuberta, as asociacións deberán presentar no Rexistro Xeral a seguinte documentación:

• Declaración xurada da súa inscrición no Rexistro Municipal de Asociacións.
• Datos sobre o número de socios que compoñen a asociación, e os fins da dita asociación, segundo se recolle nos seus Estatutos, e colectivo ao que se dirixe.
• Memoria das actividades realizadas pola entidade no último ano.
• Fotocopia compulsada do Número de Identificación Fiscal.

As solicitudes serán valoradas por un órgano colexiado formado por tres técnicos do Concello de Narón (pertencentes ós departamentos de Patrimonio, Intervención e Servizo Sociocomunitario). Esta comisión terá en conta unha serie de criterios á hora de valorar as solicitudes: o número de socios, a dispoñibilidade dun local con apertura ó público a diario ou á semana, o programa de actividades que desenvolve, o orzamento anual do que dispón, a organización de accións docentes en materia de novas tecnoloxías que precisen destos equipos informáticos, o número de ordenadores dos que xa dispoñen e que foron doados polo Concello, e o grao de cumprimento e actualización de datas no Rexistro de Asociacións.

Narón, 25 de febreiro de 2009

O Concello presenta os novos equipos informáticos da Biblioteca Municipal

As concelleiras de Novas Tecnoloxías, Paloma González, e Bibliotecas, Manuela Pérez Sequeiros, realizaron unha visita á Biblioteca Municipal do Alto para presentar ós medios de comunicación os novos equipos informáticos dos que dispón este espazo de lectura e estudo. Trátase de 30 ordenadores co sistema operativo Office 2007, equipados con 2 gigas de memoria, pantallas TFT de 19 pulgadas, rato óptico, conexión USB e lector de tarxetas para arquivos dixitais. Ademais, 2 dos equipos están adaptados para persoas con dificultades visuais, dispoñendo de monitores máis grandes e dun sofware instalado pola Organización Española de Ciegos (ONCE) que permite modifica-lo tamaño da letra, entre outras prestacións.

Os ordenadores están instalados na segunda pranta da Biblioteca, e para facer uso deles é imprescindible rexistrarse previamente no mostrador de entrada, presentando o carnet de socio ou o DNI e enchendo un formulario identificativo. Os usuarios disporán dun tempo máximo de 90 minutos, no cal haberán de respeta-las normas (non está permitido o seu uso para chatear, xogar, descargar música e vídeos, SMS, e páxinas de contidos non apropiados para unha biblioteca pública). Esta zona dispón tamén de conexión wifi, para que os internautas que o desexen poidan conectarse co seu ordenador portátil.

Actualmente, os lectores poden elexir entre os 31.741 fondos bibliográficos dos que dispón a Biblioteca do Alto, e que poden consultarse neste enderezo web: www.opacmeiga.rbgalicia.org. Seleccionando a localidade de Narón, a páxina amosa o catálogo de lectura desta biblioteca, e nun prazo breve de tempo permitirá tamén ó usuario facer as súas suxerencias literarias e reseñas sobre títulos que xa están nas estanterías deste lugar.

A adquisición dos equipos forma parte dun plan de mellora e actualización da Biblioteca Municipal, que a data de hoxe dispón dun total de 12.306 socios (para aboarse é necesario achega-la fotocopia do DNI e duas fotos de carnet, encher un impreso e pagar unha cuota simbólica dun euro anual). O horario de apertura ó público é de luns a venres de 10:00 a 13:00 horas e de 16:00 a 22:00, e os sábados pola mañá no mesmo horario. O servizo é público e poden facer uso del tódalas persoas de Narón e do resto da bisbarra.

Narón, 27 de xaniro de 2009

eiro