Alumnos de 1º de Biblioteconomía da Universidade da Coruña visitaron o Arquivo Municipal para coñece-lo seu funcionamento

Un grupo de 10 alumnos/as de 1º curso da Facultade de Biblioteconomía e Documentación da Universidade da Coruña visitou onte o Concello de Narón, onde tomaron contacto directo coas materias que están a estudar nesa diplomatura. Os participantes estiveron acompañados pola profesora Mª de las Nieves Peiro Graner, e recibiron unha charla na que se lles explicou como é o traballo diario do arquiveiro e do auxiliar de arquivo, e como funciona o Arquivo Municipal.

A continuación, baixaron ata o sótano da Casa Consistorial para visita-las instalacións que albergan o Arquivo Municipal, incluido o Arquivo Histórico. Os estudantes universitarios coñeceron o material de uso diario do arquivo (como carpetas, fichas, caixas, e libros de rexistro) e se lles explicou o proceso de dixitalización do mesmo, a través do programa informático “Albalá”.

Finalmente, os estudantes de Biblioteconomía e Documentación ollaron algunhas das antigas fotografías que forman parte do arquivo municipal, e que están dispoñibles no seguinte enderezo web: www.arquinaron.es.

A xestión do Arquivo Municipal é competencia da Concellería de Novas Tecnoloxías e Protocolo, dirixida pola edil Paloma González Cuevas.

Narón, 30 de abril de 2009

O Plan de Emprego Experimental do Concello logra insertar á maioría dos alumnos inscritos nos seus cursos

O alcalde de Narón, Jose Manuel Blanco, e a concelleira de Formación Laboral e Emprego, Paloma González Cuevas, entregaron onte os diplomas ós alumnos do Plan de Emprego Experimental “Construnar 09″, promovido polo Concello. Este programa foi deseñado especificamente atendendo ás demandas dos empresarios da comarca, e dos propios usuarios do plan. Deste xeito, o Concello promoveu un total de tres cursos (manipulador de alimentos, carretilleiro, e prevención de riscos laborais) que foron seguidos con éxito por 33 persoas.

Todas elas están xa traballando, segundo recordou hoxe a responsable de Formación Laboral, Paloma González Cuevas. A edil explicou que o compromiso do Concello coa Xunta (quen financia parte do programa) era acadar unha inserción laboral do 20% dos alumnos, algo que se superou con creces. Nestes intres, a porcentaxe de inserción é do 66%, xa que inicialmente se seleccionaron 50 persoas -preferentemente mulleres e persoas pertencentes a sectores que están sufrindo a crise, como a construción-.

O programa contou cun orzamento total de 47.500 euros (36.000 euros achegados pola Consellería de Traballo, e os 11.500 euros restantes foron achegados polo Concello de Narón).

Os cursos comezaron o 1 de decembro de 2008, e rematarán o 31 de xullo deste ano.

Narón, 17 de abril de 2009

A Concellería de Promoción Económica promove a II Gala do Comercio de Narón, que se desenvolverá o 15 de maio no Pazo da Cultura, con entrada gratuita

A Concellería de Promoción Económica de Narón, dirixida pola edil Ángeles Díaz Pardo, organiza a II Gala do Comercio de Narón, que se desenvolverá o día 15 de maio ás 20.00 horas no Pazo da Cultura. A entrada ó espectáculo será gratuita, para que tódolos veciños de Narón e comarca poidan coñece-las propostas do comercio de Narón.

O desfile consistirá nunha pasarela de modelos profesionais, que amosarán a colección de primavera-verán de home e muller. Poderán participar na Gala tódolos comercios do municipio, nas seguintes categorías: moda muller e home (casualwear, urban, prêt-à-porter), moda nupcial e de cerimonia, moda infantil, lencería, moda baño, roupa deportiva, zapatería e marroquinería, complementos do vestir, complementos da visión (ópticas), xoiería e reloxería.

Ademais, poderán colaborar perruquerías, salóns de estética e maquillaxe (para os modelos participantes), floristerías e invernadoiros (para o adorno floral do escenario e da pasarela, para os ramos de noiva e reparto de caraveis), axencias de viaxes, artigos de regalo e electrodoméstricos. Estes tres últimos, para regalar ós asistentes productos e servizos no sorteo final do desfile.

Aqueles comercios interesados en amosa-los seus artigos, que aínda non estean inscritos neste evento, poderán facelo no Concello. Poderán participar na Gala do Comercio tódolos establecementos de Narón, independentemente de pertencer ou non á Asociación de Comerciantes.

Narón, 17 de abril de 2009

As tres Escolas Infantís Municipais de Narón suman 260 novas solicitudes para o vindeiro curso 2009-2010

A Concellería de Infancia de Narón, dirixida por Miguel Hermida, ven de anuncia-lo número de solicitudes rexistradas no Concello para acceder ás Escolas Infantís Municipais (EIM) da Solaina, Piñeiros e A Gándara de cara ó vindeiro curso escolar 2009-2010. En total, recibíronse 260 novas solicitudes, ademáis das 154 reservas de prazas por parte de nenos que xa están escolarizados nestos centros.

A continuación detállanse os datos por centros e idades:

Solicitudes por idades:

• -22 solicitudes de non nados./
• -22 solicitudes de nados no 2009 (de 0 a 1 anos)
• -112 solicitudes de nados no 2008 (de 1 a 2 anos)
• -104 solicitudes de nados no 2007 (de 2 a 3 anos)

Solicitudes por escolas:

• -81 para a Escola Infantil da Solaina
• -87 para a Escola Infantil de Piñeiros
• -92 para a Escola Infantil da Gándara

Por escolas e idades:

• -EIM da Solaina: 3 solicitudes de non nados, 5 de nados no 2009, 37 de nados no 2008, 36 de nados no 2007.
• -EIM de Piñeiros: 12 solicitudes de non nados, 6 solicitudes de nados no 2009, 36 solicitudes de nados no 2008, e 33 solicitudes de nados no 2007.
• -EIM da Gándara: 7 solicitudes de non nados, 11 solicitudes de nados no 2009, 39 solicitudes de nados no 2008, e 35 solicitudes de nados no 2007.

Reservas de praza (alumnos/as que xa están nas EIM):

• -52 reservas na Solaina
• -50 reservas en Piñeiros
• -52 reservas na Gándara

Segundo apuntou o Edil de Infancia, Miguel Hermida, as listaxes definitivas de admitidos daranse a coñecer no mes de xuño, logo de reunirse a comisión de baremación.

Á hora de adxudicar as prazas, terán preferencia os nenos que xa estivesen matriculados no centro durante o pasado curso, seguidos daqueles que xa teñan un irmán no centro. O segundo grupo preferente é o dos fillos/as do persoal que traballe nas escolas infantís municipais, e por último os novos ingresos que acaden o baremo máis alto, segundo os criterios que se explican a continuación:

O Concello primará ás parellas que traballen fóra do fogar familiar (6 puntos sumando pai e nai), ás familias monoparentais (3 puntos), ás familias numerosas (3 puntos), ás familias afectadas por minusvalidez física, síquica ou sensorial ou enfermidades que requiran tratamento (2 puntos), fillos nados en parto múltiple (1 punto), familias con persoas a cargo (1 punto). A isto sumaranse 2 puntos por cada membro da unidade familiar. Ademais, os desempregados terán outros 2 puntos.

Tamén se baremarán outras cuestións coma a situación laboral e os ingresos familiares, dando prioridade ás rendas máis baixas.

O número total de solicitudes para o vindeiro curso 2009-2010 aumentou en sete respecto ó ano pasado, no que se rexistraron 253 novas peticións. /p>

Para este ano, ofrécense preto de 270 prazas (90 por cada centro) en quendas de mañá e tarde, pero esta cifra podería aumentar xa que moitos pais elixen horario de media xornada, deixando a praza libre no resto do día. Aínda así, os nenos con reserva de praza (154) xa teñen asegurada a súa continuidade, polo que as prazas libres vense reducidas por esta circunstancia.

Estos datos revelan a necesidade de construir unha nova gardería, idea coa que se está a traballar, para a zona de Xuvia. A elección do lugar responde ó crecemento da poboación de Narón e tamén de dispersión xeográfica, co fin de descentralizar servizos do triángulo Santa Icía-Alto do Castiñeiro-A Gándara, algo no que incidíu especialmente o edil de Infancia, Miguel Hermida.

Narón, 17 de abril de 2009

O Concelleiro de Transporte Público criticou a subida do prezo do billete de autobús que pretende realiza-la Xunta

O Concelleiro de Transporte Público de Narón, Serafín González Pena, enviou un escrito á Dirección Xeral de Transportes da Xunta de Galicia en resposta á decisión do goberno autonómico de incrementa-lo prezo do billete de autobús sen previo aviso. O edil naronés considera que a Dirección Xeral de Transportes leva tres anos incumprindo os compromisos que adquiriu cos concellos ó asina-lo Plan de Transporte Metropolitano, que lle obligaba a reunir á Comisión de Seguemento -formada polos concellos que integran este convenio de transporte- antes de adoptar decisións coma esta.

O Concelleiro de Transporte Público enviou unha carta a este organismo autonómico logo de coñece-los plans da Dirección Xeral de Transportes que pasan por subi-lo prezo do billete ós viaxeiros con mínimo de percepción de 0,71 a 0,72 euros a partires do vindeiro 13 de abril. Serafín González lembra que o convenio en vigor especifica na cláusula 4 de estipulacións –no seu apartado 1, sobre política tarifaria- que “tanto as achegas das administracións como a tarifa mínima aplicable na área poderán ser actualizadas anualmente, segundo os criterios de actualización de tarifas fixados pola Consellería de Política Territorial, Obras Públicas e Transporte, pero previa análise e proposta da comisión de seguemento deste convenio”

Ademais, Serafín González criticou a suba da aportación dos concellos a este Plan de Transporte “decidida tamén, unilateralmente e sen comunicación, pola Dirección Xeral e que o Concello de Narón rexeitou pola súa ilegalidade”, di o texto do escrito. Ante esta situación, o edil de Transporte manifesta a súa vontade de manter “unha xuntanza urxente co novo equipo directivo da Dirección Xeral de Transportes, para tratar de impulsa-lo Plan de Transporte Metropolitano na comarca de Ferrol. Tamén reclamamo-lo cumprimento dos acordos do Plan asinados no ano 2005 e aínda sen cumprir pola Dirección Xeral de Transportes, e a retirada da proposta da Xunta que, ó noso xuizo, consolida un escenario no que os concellos que non sons cabeceira de comarca son tratados inxustamente”, conclúe a carta enviada polo delegado de Transporte de Narón.

Narón, 17 de abril de 2009

O Concello pecha hoxe o prazo de inscrición nas tres Escolas Infantís Municipais

A Concellería de Infancia, dirixida polo edil Miguel Hermida, pechou hoxe o prazo de inscrición nas Escolas Infantís Municipais da Solaina, Piñeiros e A Gándara para nenos/as de 3 meses a 3 anos de idade, de cara ó vindeiro curso escolar 2009-2010.

O Concello oferta un total de 16 novas prazas para nenos de 0 a 1 ano en cada unha das tres Escolas Infantís Municipais (EIM). Ademais, existen outras 26 prazas para nenos de 1 a 2 anos, e 40 prazas para nenos de 2 a 3 anos en cada EIM, aínda que teñen preferencia os nenos que xa estivesen escolarizados neste curso.

A documentación que debían achega-los proxenitores é a seguinte:

a) Documentación da situación familiar

• Fotocopia cotexada do Libro de Familia e/ou cartilla de familia numerosa.
• Fotocopia cotexada dos DNI ou NIE dos proxenitores ou titores.
• Certificado de empadroamento e convivencia que será expedido polo Concello, no caso dos veciños de Narón.
• Copia cotexada da sentenza de separación, nulidade ou divorcio, ou calquera outra documentación acreditativa da circunstancia socio-familiar alegada.

b) Documentación da situación económica

• Copia cotexada da última declaración da renda de tódolos membros da unidade familiar ou, no seu defecto, certificado emitido pola Delegación de Facenda que avale a súa non presentación. De non presentarse este certificado acompañarase certificado de imputación de rendas expedido pola Delegación de Facenda; copia cotexada das dúas últimas nóminas; certificación positiva ou negativa de percepción de prestación económica do INEM; certificación de ingresos por pensións emitido polo organismo pagador; xustificante doutros ingresos, ou declaración xurada dos mesmos e xustificante laboral de proximidade ás EIM.
• Os autónomos acreditarán tamén os pagamentos fraccionados do ano correspondente.
• Certificado de intereses e retencións bancarias.
• Certificado ou Informe de vida laboral expedido pola Tesourería Xeral da Seguridade Social.
• Certificado do departamento de rendas do concello, de tódolos membros da unidade familiar (tramítase dende o propio departamento do Concello).
• Outros documentos, se proceden, nos que consten incidencias familiares, económicas e sociais susceptibles de puntuación no baremo.

Horario e prezos para o Curso 2009–2010

• Apertura do centro: 7:30 a 20:00
• Xornada de mañá: 9:30 a 13:30
• Xornada de tarde: 15:30 a 19:30 ou de 16:00 a 20:00
• Xornada completa: 8 horas

Prezo por asistencia

Fíxase en 110 € mensuais para a xornada completa e de 76,45 € mensuais para a media xornada. Segundo a renda per cápita mensual da unidade familiar, sobre este prezo aplicaranse as seguintes reduccións totais ou parciais:

• Inferiores ó 50% do SMI              -> Redución do 100%  -> Non paga.
• Entre o 50% e o 75% do SMI      -> Redución do 70%    -> Paga 33 euros.
• Entre o 76% e o 99% do SMI      -> Redución do 40%    -> Paga 66 euros.
• Entre o 100% e o 150% do SMI  -> Redución do 10%    -> Paga 99 euros.

Prezo por servizos complementarios

a) Nos centros que presten outros servizos, os prezos ós que fai referencia o punto 1 incrementaranse segundo os servizos dos que o neno sexa usuario:

• Servizo de comedor: o prezo por este servizo fíxase en 33 euros mensuais. No caso de nenos que non utilicen habitualmente o servizo de comedor e que excepcionalmente, e por motivos xustificados, desexen utiliza-lo servizo algún día, o prezo será de 2 euros por día.
• Horario ampliado: o prezo mensual de cada hora en que se incremente o horario normal será de 13,75 euros.

b) Segundo a renda per cápita mensual da unidade familiar, sobre os prezos dos servizos anteriores aplicaranse reducións totais ou parciais:

• Inferiores ó 30% do SMI, redución do 100%.
• Entre o 30% e o 100% do SMI, redución do 50%

Narón, 31 de marzo de 2009

A Concellería de Novas Tecnoloxías recibe preto de 40 solicitudes para a cesión de ordenadores en propiedade

A Concellería de Novas Tecnoloxías, dirixida por Paloma González Cuevas, está a valorar nestes días as solicitudes presentadas polas asociacións e entidades inscritas no Rexistro Municipal de Asociacións, de cara á cesión de material informático en propiedade.

Durante o prazo no que se mantivo aberta a convocatoria, o Concello de Narón recibiu preto de 40 solicitudes que nestes días se baremarán tendo en conta unha serie de criterios como o número de socios das entidades, o programa de actividades que desenvolven e se requiren o uso de ordenadores, e o local no que realizan o seu traballo. (As bases desta convocatoria permanecen expostas na páxina web municipal, www.naron.es, por si desexades consultalas).

A comisión de valoración estará integrada por tres técnicos dos departamentos de Patrimonio, Intervención e Servizo Sociocomunitario. Eles serán os encargados de baremar dende hoxe as solicitudes, e se reunirán o vindeiro día 3 de abril para dar a coñece-los nomes das entidades ás que se entregarán os equipos informáticos.

Narón, 31 de marzo de 2009

O Concello organizou un curso para aprender a usar os teléfonos móbiles no Centro Municipal de Maiores

O Concello de Narón, a través das Concellerías de Novas Tecnoloxías e Persoas Maiores, levou a cabo un curso para maiores sobre o uso do teléfono móbil, que organizou a empresa Vodafone.

O curso desenvolveuse en dúas quendas:

• Xoves 26 de marzo: Centro Municipal de Atención ás Persoas Maiores (rúa Illa San Vicente)
• Venres 27 de marzo: Centro de Maiores de Pedroso.

Paloma González Cuevas e Mª del Carmen Espada, responsables de Novas Tecnoloxías e Maiores, resaltaron o éxito desta convocatoria, na que se ensinarán ós asistentes os trucos e consellos prácticos para manexar con facilidade o seu terminal.

Narón, 31 de marzo de 2009